唸謠篇-2

目睭公
目睭公，目睭婆，吹吹馬上好。

註：以早的人目睭若予塗砂粉仔走入去，阿父、阿母會共目睭歕歕，向望塗砂粉仔會無去。

迷猜

到單你才知，

大家攏來臆迷猜。煞！

臆台灣的地名
台灣的地名是真趣味，台灣的地名是真趣味。
開張大吉臆佗位？開張大吉臆新店。
四季如春臆佗位？四季如春臆恆春。
雨後春筍臆佗位？雨後春筍臆新竹。

ABC狗咬豬

ABC狗咬豬，阿公仔坐飛機，跋一下冷支支。
叫醫生，來甲伊醫，醫一下跤骨大小支，
醫一下跤骨大小支。

大箍呆，炒韭菜

大箍呆，哎呦，白目眉，
無人請你就自己來，
來來，大箍呆，炒韭菜，
燒燒一碗來，冷冷我不愛。

大箍呆，炒韭菜，
燒燒一碗來，冷冷我不愛，
大箍呆，到今你才知，
到今你才知。

秀才騎馬弄弄來(施福珍配曲)

秀才秀才騎馬弄弄來，
佇馬頂跋落來，跋一下真厲害。

喙齒疼，糊下頷。

目睭疼，糊目眉。

腹肚疼，糊肚臍。

嘿真厲害。

打馬膠（施福珍詞曲）

打馬膠，粘著跤，叫阿爸，買豬跤，

豬跤箍仔，滾爛爛，飫鬼囡仔流喙涎。

西北雨直直落(黃敏配曲)

西北雨直直落，鯽仔魚卜娶某。
鮕鮐兄拍鑼鼓，媒人婆仔土虱嫂，
日頭暗揣無路，趕緊來火金姑，
做好心來照路，西北雨直直落。
西北雨直直落，白鷺鷥來趕路。
搬山嶺過溪河，找無岫跋一倒，
日頭暗卜怎好，土地婆做好心來帶路，
西北雨直直落。

天黑黑

天黑黑，欲落雨，阿公仔舉鋤頭仔要掘芋
掘啊掘，掘啊掘，掘著一尾漩鰡鼓，伊呀嘿都真正趣味
阿公仔要煮鹹，阿媽仔要煮淡，兩人相打弄破鼎
伊呀嘿都啷噹鏘噹嗆，哇哈哈

阿公仔要煮鹹，阿媽仔要煮淡，兩人相打弄破鼎
伊呀嘿都啷噹鏘噹嗆，哇哈哈

弄破鼎，弄破鼎，弄破鼎，伊呀嘿都啷噹鏘噹嗆，
哇哈哈，哇哈哈，哇哈哈，哇哈哈。

白翎鷥                             

白翎鷥，擔畚箕，擔到溪仔漧，

跋一倒，拾著一仙錢，

買大餅，分大姨，

大姨嫌無餘，呼雞呼狗來咒詛，

咒詛無，投姆婆，

姆婆去做客，投大伯，

大伯去賣龜，投姊夫，

姊夫去賣紙，投來投去投著我，

害我心肝博博彈，雞母換雞鴽，

雞鴽會生卵，有米兼有飯。

搖嬰仔歌

(盧雲生作詞，呂泉生作曲)

嬰仔嬰嬰睏，一暝大一寸；
嬰仔嬰嬰惜，一暝大一尺。
搖囝日落山，抱囝金金看；
汝是我心肝，驚汝受風寒。
      
嬰仔嬰嬰睏，一暝大一寸；
嬰仔嬰嬰惜，一暝大一尺。
一點親骨肉，愈看愈心適（sik4）；
暝時搖伊睏，天光抱來惜。

嬰仔嬰嬰睏，一暝大一寸；
嬰仔嬰嬰惜，一暝大一尺。
仝是一樣囝，哪有兩心情；
查甫也著疼，查某也著成。

嬰仔嬰嬰睏，一暝大一寸；
嬰仔嬰嬰惜，一暝大一尺。
細漢塗跤爬，大漢欲讀冊；
為囝款學費，責任是咱的。

嬰仔嬰嬰睏，一暝大一寸；
嬰仔嬰嬰惜，一暝大一尺。
畢業做大事，拖磨無偌久；
查甫娶新婦，查某嫁丈夫。

嬰仔嬰嬰睏，一暝大一寸；
嬰仔嬰嬰惜，一暝大一尺。
疼囝像黃金，成囝消責任；
養到恁嫁娶，我才會放心。

望春風
(作詞：李臨秋　作曲：鄧雨賢)

獨夜無伴守燈下，春風對面吹， 
十七八歲未出嫁，見著少年家， 
果然標緻面肉白，誰人家子弟， 
想欲間伊驚歹勢，心內彈琵琶， 
想欲郎君做尪婿，意愛在心內， 
等待何時君來採，青春花當開， 
聽見外面有人來，開門該看覓， 
月娘笑阮憨大獃，被風騙不知。 

收酒矸　(張邱東松 詞、曲)

阮是十三囝仔丹　自小父母就真散

為著生活不敢懶　每日出去收酒矸　

有酒矸　通賣否歹銅、舊錫、簿仔紙通賣否

透早就出門　家家戶戶去加問　

為著打拼顧三當　不驚路頭怎樣遠

有酒矸　通賣否　歹銅、舊錫、簿仔紙通賣否

頂日去迺太平通　今日就行大龍峒　

為著生活會妥當　不驚大雨佮大風

有酒矸　通賣否　歹銅、舊錫、簿仔紙通賣否

燒肉粽　

(張邱東松 詞、曲)

自悲自嘆歹命人　父母本來真疼痛　乎我讀書幾落冬　出業頭路無半項

暫時來賣燒肉粽　燒肉粽　燒肉粽　賣燒肉粽

欲做生理真困難　若無本前做昧動　不正行為是不通　所以暫時做這款 

今著認真賣肉粽　燒肉粽　燒肉粽　賣燒肉粽

物件一日一日貴　厝內頭嘴這大堆　雙腳行到欲撐腿　遇著無銷上克虧

認真再賣燒肉粽　燒肉粽　燒肉粽　賣燒肉粽

欲做大來不敢望　欲做小來又無空　更深風冷腳手凍　啥人知阮的苦痛　　　　

境迫阮賣肉粽　燒肉粽　燒肉粽　賣燒肉粽

向陽

這是一個怎麼樣的年代？怎麼樣的一個年代？
這是啥麼款的一個世界？一個啥麼款的世界？
黃昏在昏黃的陽光下無代誌罔掠目蝨相咬，
城市在星星還沒出現前已經目睭花花，匏仔看做菜瓜，
平凡的我們不知欲變啥麼蛖，創啥麼碗粿？
孤孤單單

做牛就愛拖，啊，做人就愛磨。 

拖拖拖，磨磨磨，
拖拖磨磨，有拖就有磨。
這是一個喧嘩而孤獨的年代，

一人一家代，公媽隨人差的世界。
你有你的大小號，我有我的長短調，
有人愛歕DoReMi ，有人愛唱歌仔戲，
亦有人愛聽莫札特、杜布西，

猶有彼個落落長的柴可夫斯基。
吃不盡漢堡牛排豬腳雞腿鴨賞，以及SaSiMi，
喝不完可樂咖啡紅茶綠茶烏龍，

還有嗨頭仔、白蘭地、威士忌，
唉，這樣一個喧嘩而孤獨的年代，
搞不清楚我的白天比你的黑夜光明還是你的黑夜比我的白天美麗？ 

拖拖拖，磨磨磨，
拖拖磨磨，有拖就有磨。
這是一個快樂與悲哀同在的年代，

七月半鴨不知死活的世界。
你醉你的紙醉，我迷我的金迷，

你搔你的騷擾，我搞我的高潮，
庄腳愛簽六合彩 ，都市就來博職業棒賽，
母仔揣牛郎公仔揣幼齒，

縱貫路邊檳榔西施滿滿是。
我得意地飆，飆不完飆車飆舞飆股票，

外加公共工程十八標，
你快樂地盜，盜不盡盜山盜林盜國土，

還有各地垃圾隨便倒，
唉，這樣一個快樂與悲哀同在的年代，
分不出來我的快樂比你的悲哀悲哀還是你的悲哀比我的快樂快樂？ 

快快樂樂。做牛就愛拖，啊，做人就愛磨。
平凡的我們不知欲變啥麼蛖，創啥麼碗粿？
城市在星星還沒出現前已經目睭花花，匏仔看做菜瓜，
黃昏在昏黃的陽光下無代誌罔掠目蝨相咬，
這是啥麼款的一個世界？一個啥麼款的世界？
這是一個怎麼樣的年代？怎麼樣的一個年代？